المذيعة:كنت ثاير اوي النهارده في المجلس يا سياده النائب..
النائب:اعمل ايه .. ناس مش فاهمة شغلها.. هنعللهم ولا
نشوف اشغالنا؟
المذيعة:ازاي يعني ؟
النائب: يعني واحده تقولك عايزين نعمل تعديلات في شارع الازهر
وهي البعيده..مسيحيه..مالها بقي ومال الازهر؟
المذيعة:ما هي سيلدتك بتتكلم عن الشارع مش الدين ..
النائب:مين اللي قال كده ؟ شارع الازهر يعني جامع الازهر ..يعني مناره
الاسلام ..يعني الدين بتاعنا ..يعني شرفنا وعرضنا وكرامتنا مالهم
بقي القبط ومال الكلام ده؟
المذيعة:جايز الدايرة بتاعتها فيها مسلمين وبتتكلم بالنيابة عنهم ..
النائب:حتي لو كان كده مش من حقها برضه تتكلم عن الدين ..
ممكن نسيبها تقول كلمتين عن المرور أو الحوادث أو المستشفيات
..لكن الازهر لأ.. دي خطوط حمراما حدش يقرب لها..
المذيعة:لكن حضرتك انفعلت كمان علي نائب مسلم ..
النائب:ايوه يا ستي ما هو برضه مش فاهم شغله..ازاي يعني يبقي
نائب فلاح من الدلنجات والا محلة مرحوم ويقف يتكلم عن البورصة والسياحة؟
المذيعة:ما هو من حقه يا سيادة النائب
النائب:حقه مين يا حاجة؟كل واحد يتكلم في تخصصه..الفلاح يتكلم عن الفلاحين
والصعيدي يتكلم عن الصعايدة ..والعامل يتكلم عن المصنع ..والموظف
يتكلم عن العلاوة ..والقبطي يتكلم عن القبط اللي زيه ..طول عمر المجلس بتاعنا كده
المذيعة:بس الدستور بيقول ان النائب بيمثل الشعب كله ..
النائب
يضحك بشدة)..شعب مين يا ولية ؟.. انا بقالي ربع قرن نائب وعمري ما شفت
الشعب بتاعك ده..
المذيعة:امال حضرتك بتنجح ازاي؟؟
النائب:دي حكاية تانية يا حاجة اللي زينا بيدخل المجلس عشان وراه اسرة جامده
زي القبايل اللي في البلاد اللي حوالينا ..قبيلة يعني جيش من البشر بيقفوا
معانا في الانتخابات مش تقوليلي شعب وكلام فاضي
المذيعة:بس في دورة حضرتك ما دخلتش فيها المجلس.
النائب:طبعا.. ماهو ده بقي التزوير..ولاد الحرام زوروها لواحد تاني
المذيعة:يعني حضرتك معترف بتزوير الانتخابات.
النائب:ساعات بتتزور ..بس لما الريس بيعرف مش بيسكت علي الكلام الفاضي ده
ربنا يخليه لمصر.. لولاه كانت البلد راحت في ستين داهية ..!!
